Eph 4 | ABY | STEP | Nae Yesu Kerisonu waiya ukakuneba ibake nae ana ebaro ibeka mi. Nama bunawere wakeroma wemaro ya nauawe. Godi Dawae ya we mune odiriea Dawama yabairo wei wake enaenari uawe.

Ephesians 4

Iya Godinu wake naukaisi orou iyae Yesunu ofe ari enoya wei wake

1 Nae Yesu Kerisonu waiya ukakuneba ibake nae ana ebaro ibeka mi. Nama bunawere wakeroma wemaro ya nauawe. Godi Dawae ya we mune odiriea Dawama yabairo wei wake enaenari uawe. 2 Yanu ukeka sinekae i ari eno uawe, yanu onarounu ibi da we ma daiwere uaweke yaisina owainanaku uaweke i waiya yaisina ure nudaroma owainanaku uawe. Yanu yanu imukari uke makaeweke yanu ukeka sinekae i ari eno uawe. 3 Godinu Imumu Irauma ya unu korakunea daaba imusu imusu imuka da imuaweke demui orou siaweke Danu irauaiai ibaku enaenari eno ibiawe. 4 Godinu Imumu Irau Dawae demui i ari enoe nono i Godinu wake naukaisa orou emuae ofe demui orou ari eno. Nono Godi Danu ma wirokekae demui. Godima eno imukada iya yaisina we mune odiiba ibake i demui urero ibinu daabaro amuke anifene imukaisi. 5 Iyanu Dai Waria Mi Dawae demui. Iyanu Godi imukeka imukae imusu imusu mero ie demui imuka mane. I babadaido ukekae imusu mero ie demui mane. Godi Dawae una demui. Dawae iya eme yaisina iyanu Babae. Enoba Dawama iya yaisina yawokakunike iyanu imuka ubarenaro ibaada iyabairoma Danu waiya ukaku.

7 Yesu Keriso Dawama iya buna imusu imusu ma’iba ibake iyanu waiyae imusu imusu. 8 Godinu bukaroma eno weaku,

Dawae ana ebaro ibeka orou ari eme keuwere bokai mamike urero waure amuke anirieke nono i dooro ibeka oroubairo buna imusu imusu mariea,

Godinu bukaroma eno weaku. 9 I urero amuke ani i wakenu ubiye aneme ari? I wakenu ubiye i ari eno, Dawae adinaro yewa dooro isare aarike nono owere urero amuke ani. 10 I dooro isare aarike nono urero amuke ani mi Dawae demui Mi. Ibake Dawama dooroini ureroini aboro aboro iro ibaada i eraerabusa yaisina yawokeibaku. 11 Danu oroubairo imusu imusu buna marie i dawa i ari eno, moi oroubake afasoro ukeka waiya marie. Nono moi oroubake we bou ukeka waiya marie. Nono moi oroubake Godinu wake weeka waiya marie. Nono moi oroubake sosi yawokada eme we ma iwoka ukeka waiya marie. 12 Danu ararae i oroubairo uke bou ufiaro emuama Godinu waiya ufisake i Godinu wake naukeka orounu Godi imukeka imuka ma buna ufiakane ibake buna imusu imusu marie. 13 Emuae eno ukaisaba ibake iya eme yaisinae demui orou ari sinaisi. Iyanu Godi imukeka imukae demuiba ibake iya yaisinae Godinu Amara Yesu imukada enaenari iwoka sinaisi. Enoba iyae amarananaku ari eno da sine ibifeke dai orou ari eno sifeke Yesu Kerisonu imukeka yaisina imukenewaa ukaada enaenari ufeke Dawa ari eno sifene weakune. 14 Eno ufeisiie iya amarananaku ari mero dai orou ariba ibake i we gagao orounu imusu imusu imukekae dawara ufeini oyau ari enoro ima iya waure ane aare ma owere owere eno mane da ufeku. Emenu ararae moi orounu imukeka ma merama ufiakane ibake eno ukaisa. 15 Enoba nono iyae eno da ufeke emebake imukari ukaada ba wake mane weifene weakune. Enoroma iyama, Yesu Kerisoe iyanu bokai ibake Dawabairo ma dakaa ukenewaa ufeisi. 16 Dawama Danu ofe ubu yawokakuba ibake i ofero ibinisa eraerabusa yaisina emenu orofa imusu imusuro idua ibinisa. Ibadidima ofe kai ma dakaa ukaku enaenari Yesuma iya Danu ofero ma dakaa ukakuniro iyanu waiya imusu imusu ukaisi. I ofero ibinisa eraerabusa imusu imusu emenu emenu imukari uke makanada emenu waiya imusu imusu ukaisaro i ofe bunawere ukaku.

Iya Godinu wake naukeka orounu eneibeka daabae awoena daaba ari enoya wei wake

17 Nanu moi wake Yesu Kerisonu ibiro bunawere wemaro ya yaisina nauawe. I Godinu wake nauke dakaisa orounu ukeka sineka ari eno enaenari da uawe. I ari eno ukaisa orou emenu imukekae meramawereke emenu imukae inowere. I orou emuae arara me Godinu weeka wake naukeka. Emuae Godibake koroko ukaada Godibairo ibe mero emenu imusu ibinisa. 19 Enoba emuae maru uke me ibake i emeaka emenu emenu dodoo ukaisaro nono awekabo emenu emenu dodoo ukaada moi orounu aruma aweka enare odaada nono emenu ararae i ari eno aine wai ure meramawere ukeifisane ibake meramawere aine wai ure ukeibaisa.

20 Yesu Kerisonu imukekae i ari eno me. Yae Kerisonu wake eno uke nauke dakaisa. 21 Na iwoka, moi orouma Yesu Kerisonu wake yabairo weibisaro naukeibisa ibake Danu ba imukeka iwoka sinaisa. 22 Ibake yanu merama imuka imukeka yaisina imuke mediawe. I merama imukeka ima ya adinaro uke irukeibi ibake yama i ari eno meramawere ukeibisa, i meramawere imukekae yaurada urumu weibaku i ari enoya mediawe. 23 Iduaya awoena imukeka mane muaweke awoena imuka imuawe. 24 Eno uawero yanu ukeka sinekae Godinu ukeka sineka ari sifi. Eno ufoisaie ya irauaiai mane ufoisaro yanu ukeka sinekae irauaiai sifeku.

25 Enoya meo da weawe. Iya yaisinae Yesu Kerisonu ofero ibinu eraerabusaba ibake iyanu iyanu ba wake mane we makafene weakune. 26 Yama dino ufoisaie meramawere unao ufoisaya yanu dino ukeka sabu mediaweke wiroke makaewe. Dino uke makafoisaie sabunaku we wiroke makaeweke i eweka yafa dino bobo da ibiawe. 27 Eno ufoisaie seidanima danu merama imuka yabairo manao ufiakuba ibake yanu dino ufoisa ibai sabu medifone weakune. 28 Ya i adinaro waira ukeibisa orou nono awoena waira da uaweke waiya ukenewaa uaweke oima yanu uruna make muaweke uruna me imusu orou mayakawero ifisa. 29 Merama wake da weawe. Aboro aboro yaure ibaadae irau wake mane weawero emema yanu wake naufisake emenu imukeka ara sifisake wakeye irauaiaiya eno wefisa. 30 Godinu Imumu Irauma imuka inimu unao ufekua meramawere da uawe. Yae Godinu oroubake Godi Danu Imumu Irau yanu imuka ubarenaro odike yae nanu oroua eno weada widu uke odinao uiba dubuenaro yae we mune Danu orofaro odifiakuba ibake weakune. 31 Enoya imuka merama ukekaini imuka uyarekaini dino ukekaini daiwere weekaini meo weekaini emebairo meramawere ukekaini i meramawere ukeka yaisina imuke mediawe. 32 Yanu yanu imukari uke makanada unu kore makaewe. Godi Danu Amara Yesu Kerisoma iyanu meramawere ukeka munike imuke medi enaenari yama yanu meramawere ukeka yanu yanu imuke mede makaewe.